दिल्लीसँग वार्ता गर्ने भन्दै प्रधानमन्त्री ओलीले भारतीय राजदूतलाई भेट दिएनन्


काठमाडौं । नेपाल र भारतबीच देखिएको सीसा समस्या समाधानका लागि वार्ता हुन सकिरहेको छैन । गत नोभेम्बर २ मा लिम्पियाधुरा, कालापानी र लिपुलेकसहित नेपाली भूमि समेटेर भारतले आफ्नो राजनीतिक तथा प्रशासनिक नक्सा अद्यावधिक गर्दै जारी गरेपछि दुई देशबीच सीमा विवाद बढेको हो ।

त्यस यता नेपालले बारम्बार वार्ताका लागि पहल गर्दा भारतले बेवास्ता गर्दै आयो । नक्सा जारी गरेको ६ महिनापछि गत मे ८ मा भारतले धार्चुलाबाट नेपालको लिपिम्याधुरा, कालापानी र लिपुलेक हुँदै तिब्बतको मानसरोवर जाने बाटोको उद्घाटन ग¥यो । यसपछि नेपाल र भारतबीच सम्बन्धमा टकराव बढिरहेको छ ।

वार्तामा बस्न नचाहने, तर नेपालको सार्वभौमसत्ता र भौगोलिक अखण्डताविरुद्धको कार्य गर्न थालेपछि नेपालले पनि सोहीअनुसार आफ्नो कदम अघि बढायो । मे १८ मा बसेको मन्त्रिपरिषद् बैठकको निर्णयअनुसार भूमि व्यवस्था, सहकारी तथा गरिबी निवारण मन्त्रालयले लिम्पिाधुरा, कालापानी र लिपुलेकलाई समेटेर मुलुकको राजनीतिक तथा प्रशासनिक नक्सा अद्यावधिक गर्दै जारी गर्‍यो । नेपालले नयाँ नक्सा जारी गर्ने थाहा पाएपछि भारतले रोक्ने प्रयास गरिरहेको थियो ।

भारतको अवरोधलाई झेल्दै नेपाल सरकारले नक्सा जारी गरेको बालुवाटार उच्चस्रोतले जनाएको छ । नक्सा जारी भएसँगै नेपालको संविधानको अंग बनाउन संसदमा दर्ता गरिएको नेपालको संविधान दोस्रो संशोधन विधेयक पारित हुनबाट रोक्ने भारतको प्रयास असफल भयो । यसबीचमा काठमाडौंस्थित भारतीय राजदूत विनयमोहन क्वात्राको सक्रियता बढेको थियो ।

प्रधानमन्त्री केपी शर्मा ओलीलाई भेट्ने उनको चाहना पनि पूरा हुन पाएन । प्रधानमन्त्री ओलीले राजदूतसँग नभएर दिल्ली सरकारसँग आफूले छलफल गर्ने जवाफ दिएको बालुवाटार उच्च स्रोतको भनाइ छ । स्रोतकाअनुसार वार्तामा बस्न नचाहेर नक्सा जारी गर्नेदेखि बाटोसमेत उद्घाटन गर्ने भारतको कदमप्रति दिल्ली सरकारसँग प्रधानमन्त्री ओली रुष्ट बनेका छन् ।

राजदूत क्वात्राले भेट्न समय माग्दा प्रधानमन्त्री ओलीले आफू राजदूतसँग नभएर भारत सरकारसँग छलफल गर्ने जवाफ दिएका स्रोतको दावी छ । आफूसँग भेट गर्न समय नदिएका ओलीले राजदूत क्वात्रालाई आफ्ना प्रतिनिधिसँग भेट गर्न जवाफ दिएका थिए । तत् पश्चात प्रधानमन्त्री ओलीका प्रतिनिधि बनेर पूर्व सञ्चारमन्त्री गोकुल बाँस्कोटा लैनचौरस्थित भारतीय राजदूतावास पुगेका थिए ।

लैनचौरस्थित दूतावास पुगेका बाँस्कोटालाई राजदूत क्वात्राले नक्सा सम्बन्धी विधेयक संसदबाट पारित नगर्न आग्रह गरेका थिए । यसलाई अस्वीकार गर्दै बाँस्कोटाले संविधान संशोधन हुने जानकारी गराए । साथै भारत सरकार नेपालसँग वार्ता गर्न तयार हुनुपर्ने बाँस्कोटाको माग थियो ।

प्रतिक्रिया दिनुहोस्