पूर्वमा नेकपा प्रवेश गर्नेको जन लहर धरानमा सयौंं युवा नेकपामा प्रवेश


काठमाडौं । नेकपाका युवा नेता एंव राष्ट्रिय युवा संघका अध्यक्ष रामप्रसाद सापकोटा ‘दीपशिखा’ले राष्ट्रिय अर्थतन्त्रको बिजोग अवस्था तत्कालिन कांग्रेस सरकारले बनाएको आरोप लगाएका छन् । धरानमा निर्बाचन सुरक्षा तथा स्वयंसेवक परिचालन कमिटिले आयोजना गरेको युवा प्रशिक्षण कार्यक्रममा सम्बोधन गर्दै युवा नेता दीपशिखाले तत्कालिन कांग्रेस नेतृत्वको सरकारले उद्योग तथा कलकारखानाहरु टाट पल्टाएर बन्द गराएको आरोप लगाएका हुन् ।

‘काङ्ग्रेसले २१ बर्षसम्म शासन गर्दा देशलाई आर्थिक रुपमा पुरै खोक्रो बनायो, बिराटनगर जुटमिल र बाँसबारि छाला उद्योगलगायत दर्जनौ उद्योग तथा कलकारखानाहरु बन्द गरायो”, कार्यक्रमलाई सम्बोधन गर्दै युवा नेता दीपशिखाले भने, “राष्ट्रिय अर्थतन्त्रको बिजोग अवस्थालाई त नेकपा सरकारले सपार्न खोज्दैछ, हामीले कांग्रेसले बेचेका र बन्द गराएका उद्योग फिर्ता ल्याउने र सञ्चालन गर्ने तयारी गरेका छौं ।”

बेचिएका उद्योगधन्दा र बन्द भएका कलकारखानाको सञ्चालन नगरी देशले आर्थिक समृद्धिको बाटो नलिने दीपशिखाको भनाई छ । उनले विदेशीएका युवाशक्तिलाई स्वेदश फिर्ता नगरी देशले विकासमा फड्को मार्न नसक्ने दीपशिखाको भनाई छ । उनले नेकपा सरकारले विकास र समृद्धिभन्दा बाहिर केहि नसोंचेको पनि बताए । उनले नेकपा सरकारले अगाडि सारेको समृद्धिको अभियानलाई साथ दिन उपनिर्वाचनबाट नेकपाका उम्मेदवारलाई जिताउन पनि आग्रह गरे ।

सयौं युवाहरु विभिन्न पार्टी परित्याग गरि नेकपामा प्रवेश

यसैबीच विभिन्न पार्टी परित्याग गरि धरानका १ सय ५० जना युवाहरु नेकपामा प्रवेश गरेका छन् । राष्ट्रिय युवा संघले आयोजना गरेको युवा प्रशिक्षण कार्यक्रममा संघका अध्यक्ष दीपशिखाले उनिहरुलाई पार्टी प्रवेश गराएका हुन् ।

नव प्रबेशी युवाहरुलाई स्वागत गर्दै अध्यक्ष दीपशिखाले देशको समृद्धि र विकासको लागि युवाहरुको एकता आवश्यक रहेको बताए । उनले युवाहरुको भविष्यको लागि नेकपा सरकारले विशेष रुपमा ध्यान दिएको पनि बताए ।

पुर्णबहादुर भुजेलको सभापतित्वमा सम्पन्न प्रशिक्षण कार्यक्रममा नेकपा प्रदेश नं. १ का सदस्य मुक्साहाङ मेन्याङ्बोलगायतले समेत सम्बोधन गरेका थिए ।

आगामी मंसिर १४ हुने उपनिर्वाचनमा धरान उपमहानगरपालिकामा रिक्त रहेको मेयरको लागि नेकपाबाट युवा नेता प्रकाश राईको उम्मेदवारी परेको छ ।

प्रतिक्रिया दिनुहोस्